Ховд аймагт “Чандмань уушир” ХХК-ийн барьж байсан 40 айлын орон сууцны барилгын талбайд 11 хүн өндрөөс унаж, 3 хүн нас барсан талаар цагдаагийн байгууллагаас мэдээлэл өглөө.

ЦЕГ-ын хэвлэл мэдээллийн төвийн ахлах мэргэжилтэн, хошууч С.Баярбилэг “Ховд аймагт өчигдөр буюу энэ сарын17-нд “Чандмань уушир” ХХК-ийн баригдаж байсан барилгын подем тасарснаас хүн уналаа гэх мэдээлэл бүртгэгдсэн. Барилгын талбайд 11 хүн осолдсоноос гурав нь нас барсан, найм нь тус аймгийн нэгдсэн эмнэлэгт хүргэгдээд байна. Одоогоор тухайн хэргийг Ховд аймгийн цагдаагийн газраас шалгаж байгаа.

Урьдчилсан байдлаар 2024 оны дөрвөн сараас эхлэн 40 айлын орон сууцны зориулалтаар баригдаж байсан барилга дээр ажиллаж байсан 11 иргэн өргөгч төхөөрөмжтэйгөө унаснаас үүдэж осол гарсан. Олон нийтийн сүлжээгээр зөрүүтэй тоон мэдээлэл явж байна. Одоогоор бол уг ослын улмаас гурван иргэн нас барсан. Эмнэлэгт хүргэгдсэн найман иргэдээс гурван иргэний биеийн байдал хүнд байна гэх мэдээллийг аймгийн эрүүл мэндийн төвөөс ирүүлсэн. Цагдаагийн байгууллагаас шалгалтын ажиллагааг явуулж байна” гэлээ.