Ерөнхий сайд бөгөөд МАН-ын дарга Л.Оюун-Эрдэнэ УИХ дахь намын бүлгийнхээ хуралд оролцжээ. Ингэхдээ ойрын хугацаанд намынхаа Удирдах зөвлөл, Бага хурлыг хуралдуулах санал гаргажээ.

Харин үүнийг нь зарим гишүүд эсэргүүцсэн байна. Тухайлбал, Б.Энхбаяр гишүүн “Эдгээр хурлаар юу ярих гэж байгаа юм бэ. Хэрэв таны гэр бүл болон үр хүүхэдтэй холбоотой үүссэн асуудлыг буюу ёс зүйтэй холбоотой асуудлыг хэлэлцүүлэх гэж байгаа бол зөвшөөрөхгүй шүү. Намын байгууллага бол хувь хүний гэр бүлийн асуудлыг хэлэлцээд санал хураадаг газар биш. Өөрөө шийдвэр гаргах боломжтой асуудал дээр биднийг бүгдийг нь, УИХ-ыг татаж оролцуулж болохгүй. Энэ бол намын гишүүдийн хариуцлага хүлээх асуудал биш” гэжээ.