Улаанбурхан өвчний батлагдсан тохиолдол 253 болж сүүлийн нэг хоногт 33 шинэ тохиолдол бүртгэгдлээ. Улаанбурхан өвчний тохиолдлууд ихэвчлэн Ерөнхий боловсролын сургуульд голомтлон гарч байгааг ХӨСҮТ-өөс анхааруулаад байна. Одоогийн байдлаар,

• Эмнэлэгт хэвтэн эмчлүүлж байгаа 116
• Эдгэрсэн 119
• Гэрээр эмчлүүлж буй 18
• Сэжигтэй 100
• Хавьтал 7220

Улаанбурхан нь маш амархан халдварладаг вирус юм. Уг өвчнөөр өвчилсөн хүнд хүрэх эсвэл нэг агаараар амьсгалахад л вирусээр халдварлах хангалттай шалтгаан болдог. Вирус нь агаар болон халдвартай гадаргуу дээр хоёр цаг хүртэлх хугацаанд тэсвэртэй байдаг. Халдвар авсан хүнд эхний өдрөөс эхлэн халуурах, ханиалгах, нус гоожих зэрэг шинж тэмдэг илэрнэ. Эдгээр шинж тэмдгүүд нь тууралт үүсэхээс дөрвөн хоногийн өмнө эхэлдэг байна. Иймд халдвараас сэргийлэх үүднээс улаанбурхны эсрэг вакцинд хамрагдаж өөрийгөө болон бусдыг улаанбурхан өвчнөөс хамгаалахыг Халдварт өвчин судлалын үндэсний төвөөс мэдээллээ.