Дорнод аймгийн Баянтүмэн сумын Хотонт багийн “Цайдам нуур” гэдэг газар хээрийн гал түймэр гарсан тухай дуудлагыг дөрөвдүгээр сарын 6-ны өдрийн 18.00 цагт холбогдох албаныхан хүлээн авсан. Дуудлагын дагуу тус аймгийн Онцгой байдлын газрын алба хаагчид, Баянтүмэн сумын Засаг даргын Тамгын газар, Хэрлэн сумын Засаг даргын Тамгын газрын ажилтнууд очиж хээрийн гал түймрийг унтраахаар ажиллаж 22.00 цагт цурамд оруулжээ. Албан хаагчид дөрөвдүгээр сарын 7-ны өдрийн 14:30 цагт галыг бүрэн унтраасан байна. Хээрийн гал түймэрт 120 га талбай өртөж шатсан нь урьдчилсан байдлаар тогтоогджээ.

Булган аймгийн Дашинчилэн сумын Хараат багийн “Залай” гэдэг газар мөн хээрийн гал түймэр гарчээ. Энэ тухай дуудлагыг дөрөвдүгээр сарын 07-ны өдрийн 13.55 цагт хүлээн авсан. Тус аймгийн Онцгой байдлын газрын Дашинчилэн сум дахь Эрэн хайх, аврах бүлгийн алба хаагчид, сумын Мэргэжлийн ангийнхан, орон нутгийн иргэд хээрийн гал түймрийг унтраахаар ажиллаж 19.13 цагт бүрэн унтраасан байна. Урьдчилсан байдлаар хээрийн гал түймэрт 45 га талбай өртөж шатжээ.