Чөлөөт бөхийн Азийн АШТ-ий тав дахь өдөр Монголын таван бөх барилдаж, нэг мөнгө, хоёр хүрэл медалийн эзэн боллоо.

2024 оны ДАШТ-ий хүрэл медальт, ОУХМ Ц.Цогбадрах Азийн аваргаас анхны медалиа хүртлээ. Тэрээр 65 кг-ын финалд өсвөрийн ДАШТ-ий хүрэл медальт, 2024 оны Бүх Японы аварга Кайсей Танабед 12:2-оор дийлдэн мөнгөн медаль хүртэхээр болсон юм.

79 кг-д зодоглосон ОУХМ О.Сүлдхүү хүрэл медалийн төлөөх барилдаанд Кыргызстаны бөх, ДАШТ-ий хүрэл медальт, Азийн АШТ-ий алт, хүрэл медальт Арсалан Будажаповыг буулгаж авсан юм. Барилдааны үндсэн цаг 4:4-өөр тэнцэж, манай бөх сүүлийн оноо авсан үзүүлэлтээр илүүрхлээ. Ингэснээр О.Сүлдхүү тивийн аваргаас хоёр дахь медалиа авч байна.

Залуучуудын ДАШТ-ий хүрэл медальт, ОУХМ Б.Мөнх-Эрдэнэ Азийн АШТ-ээс анхны медалиа хүртсэн. Тэрээр 57 кг-ын хүрэл медалийн төлөөх барилдаанд Японы залуу бөх Рин Сакамотог 5:1-ээр буулгаж авсан юм.