Эрүүл мэндийн яамнаас сурагчдын эрүүл мэнд, боловсролыг нь дэмжих, олон нийтийн оролцоог хангах зорилгоор Боловсролын яамтай хамтран “Эрүүл аюулгүй сургууль” арга хэмжээг хэрэгжүүлж эхэлсэн. Үүний хүрээнд Ерөнхий боловсролын сургуулийн нэгдүгээр ангийн суралцагчдад нүд, шүд, зүрхний эрт илрүүлгийн үзлэг хийсэн юм.

Энэ талаар Эрүүл мэндийн сайд Т.Мөнхсайхан мэдээлэл өглөө. Тэрээр “1999 оноос шүдний төсөл хөтөлбөр хэрэгжүүлсэн ч өнөөдрийг хүртэл өвчлөл буураагүй байна. Энэ жилийн хувьд сургуульд суурилсан эрт илрүүлгийн тогтолцоог эхлүүлсэн. Ингэхэд 94 орчим хувь нь шүдний өвчлөлтэй байна. Хүүхдүүд болон эцэг, эхчүүдэд шүдээ хэрхэн зөв угаах тухай боловсрол, мэдлэг олгож байна. Өвдсөн хүүхдүүдэд хувийн аль эмнэлэгт үзүүлэх тогтолцоог бий болгосон. Үзлэгт хамрагдсан хүүхдүүдийн 20 орчим хувь нь эмчилгээ хийлгэсэн байна. Хоёрдугаар ангид нь хоёр удаа хяналтын үзлэг хийнэ. Тэгэхээр хүүхдүүдийн шүдний өвчлөл эрс сайжирна” гэв.