2019 онд Үндсэн хуульд өөрчлөлт оруулснаар УИХ-ын ээлжит чуулган 75-аас доошгүй ажлын өдөр чуулдаг болсон. Ингэснээр 2020 оны сонгуулиар бүрдсэн УИХ-аас эхлэн хаврын чуулганыг гуравдугаар сарын 15-наас хуралдаж эхлүүлдэг болсон юм. Түүнээс өмнө хаврын чуулганыг дөрөвдүгээр сарын 5-нд эхлүүлдэг байлаа. Энэ удаад гуравдугаар сарын 15 нь амралтын өдөр таарсан учир УИХ хаврын чуулганаа өнөөдөр нээнэ.

Хаврын ээлжит чуулганаар хэлэлцэх асуудлын жагсаалтыг хуульд заасны дагуу өмнөх ээлжит чуулганаар баталсан бөгөөд уг жагсаалтад батлах хугацааг нь хуульд тусгайлан заасан Монгол Улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуулийн болон Монгол Улсын хөгжлийн 2026 оны төлөвлөгөө батлах тухай, Монгол Улсын 2024 оны төсвийн гүйцэтгэл батлах тухай, Засгийн газрын өрийн удирдлагын 2026-2028 оны стратегийн баримт бичиг батлах тухай, УИХ-ын 2025 оны намрын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай, УИХ-ын 2025 оны намрын ээлжит чуулганаар хэлэлцэх асуудлын тухай тогтоолын төслүүдийг тусгаад байгаа юм. Харин УИХ-д хууль санаачлагчдаас өргөн мэдүүлсэн хуулийн болон УИХ-ын бусад шийдвэрийн төслийг хаврын ээлжит чуулганаар хэлэлцэх, эсэхийг тухай бүр шийдвэрлэх юм.

УИХ-ын 2025 оны хаврын ээлжит чуулганы нээлтийн үйл ажиллагаанд Ерөнхийлөгч тааллаараа, Ерөнхий сайд болон Үндсэн хуулийн цэц, Улсын дээд шүүх, Шүүхийн ерөнхий зөвлөлийн гишүүд, УИХ-аас удирдлага нь томилогддог байгууллагуудын дарга нар, Монгол Улсад суугаа гадаад улс орны Элчин сайдууд, Дипломат төлөөлөгчийн газар, олон улсын байгууллагын тэргүүнүүд урилгаар оролцоно.