ДНБ 2024 онд 32.1 их наяд төгрөг болж, өмнөх оноос 1.5 их наяд буюу 4.9 хувиар өсжээ. Ингэж өсөхөд уул уурхай, олборлолтын салбарын нэмэгдэл өртөг 419.2 (10.8%) тэрбум төгрөгөөр, үйлчилгээний салбарын нэмэгдэл өртөг 1.5 (9.8%) их наяд төгрөгөөр нэмэгдсэн нь голлон нөлөөлсөн гэдгийг Үндэсний статистикийн хорооноос мэдээллээ.

ДНБ гэдэг нь тухайн нутаг дэвсгэрийн хүрээнд тайлант хугацаанд дотоод, гадаадын аж ахуйн нэгж, байгууллага, иргэдийн шинээр бүтээсэн нийт нэмэгдэл өртгийн хэмжээ юм. ДНБ-ийг дараах гурван аргаар тооцоолон гаргадаг.

Үйлдвэрлэлийн арга: -Нийт үйлдвэрлэлээс завсрын хэрэглээг хасаж нэмэгдэл өртгийн нийлбэр дүнгээр тооцохыг,

Эцсийн ашиглалтын арга: -Эцсийн хэрэглээ, хөрөнгийн нийт хуримтлал, цэвэр экспортын (экспорт, импортын зөрүү) нийлбэрээр тооцохыг,

Орлогын арга: -Ажиллагчдын цалин хөлс, үндсэн хөрөнгийн хэрэглээ, үйлдвэрлэл, импортын цэвэр татвар, үйл ажиллагааны цэвэр ашиг/холимог орлого зэрэг орлогын үзүүлэлтийн нийлбэрээр тооцохыг ойлгоно.